තාරකා විද්‍යාවට ඇරඹුමක්!

විශ්වයෙහි අන්තර්ගත දෑ මොනවද? මොන වගේද? ඒක ටිකක් සංකීර්ණ ප්‍රශ්නයක්! ඇත්තටම පෙනෙන විදියට විශ්වයේ සියලුම දේ භෞතිකයි. පදාර්ථය සහ ශක්තිය යන දෙවර්ගයෙන් තමයි අපි දන්න විදියට භෞතික ලෝකය නිර්මාණය වෙලා තියෙන්නේ. ඉතින් අපි දැන් ඒ විශ්වය නම් අභිරහස් සාගරයෙන් එය තුල ඉතාම කුඩා අවකාශයක් අත්කර ගන්නා(එය සිතුවිල්ලක් පමණි) පෘථිවිය දෙස බලමු.

පෘථිවිය නිර්මාණය වී ඇත්තේ කුමකින්ද? ඒක දැනගන්න අපිට එය නිර්මාණය වූ අවදියට යන්න වෙනවා. පෘථිවිය ඇතුලු ග්‍රහලෝක, තාරකා සහ අනෙක් සියලු දේ චලනය වේ. සෑම වස්තුවක්ම ඊට ආවේණික චලිතයක යෙදෙයි. ඉතින් මේ වස්තූන් වලට මේසේ චලනය වීමට බලය යෙදුවේ කවුද? අහස දෙස මිනිසා බැලුවේ සැම විටම කුතුහලය පිරි දෑසකිනි. එය වසර දහස් ගණනකට එහාට දිව ගිය කතාවක්.

සරලව කිව්වොත් එඩේර යුගයේදී තමා මිනිසා අහස දෙස විමසිලිමත් වී සිටීමට පුරුදු වෙන්නට පටන්ගත්තේ. එඩේරික ජීවිතයට හුරු වූ ජනයා රාත්‍රී කාලයේ තම ඇති කරන සතුන්ව තණ පිටියක එක් තැන් කොට තබාගෙන සිටියි. ඉතින් මේ අතරතුර එඩේරැන්ට විවේක ගැනීමට කදිම වෙලාවක්. තම විඩාව නිවා ගැනීමට තණ පිටිය මත දිගා වී සිටින එඩේරුන්ට නිරායාසයෙන්ම අහස දෙස බැලෙයි. මෙසේ අහස දෙස බලා තම කුතුහලය සන්සිදුවා ගනී. තරු එකිනකට ඈඳාගෙන තරු රටා මැවීමට ඔවුන් සමත් විය. ඒ වගේම සෑම තරු රටාවක් වටාම රසවත් කතා ගෙතිණි. ඒවායේ ගුප්ත බව නිසා ඔවුන් ඒවට දේවත්වයක් ආරෝපණය කලා. අද දක්වා පැවත එන ග්‍රීක පුරාවෘත්ත වල ආරාම්භය එයයි.

යුරෝපයේ පුනරුදයෙන් පසු පුරාවෘත්තයක් වූ අහස විනිවද යෑමට හැකි බුද්ධිමතුන් පිරිසක් බිහි විය. ඔවුන් විසි සොයා ගන්නා ලද දෑ බෝහෝ ය. එහෙම කිව්වට‍ යුරෝපය පමණක් නොවේ අහස දෙස විමසිලිමත් වුණේ. පෙරදිග ශාස්තෘවරුන් යුරෝපයට පෙර සිටම මේ දේවල් ගැන විමසිලිමත්ව සිටියා. කෙසේ වෙතත් විද්‍යා සහ තාක්ෂණය දියුණුවෙන් මේ ලෝකයෙන් එපිටත් ජීවය රැගෙන යාමට මිනිසා සමත් වුණා. සඳ මතුපිට පා තැබීමෙන් පසු දැන් අඟහරු මත පා තබන්නට වෙර දරන බව දැන් නොරහසක්. ඉතින් මේ සියල්ලටම විද්‍යවේ දියුණුව හේතු වෙලා තියෙනවා. ඉතින් ඔන්න ඔය අංශය වෙතට දැක්වූ උනන්දුව නිසාම ඒකටත් අනු විද්‍යාවක් වෙන් කෙරුණා. ඒ තමයි තාරකා විද්‍යාව. නමේ හැටියටනම් තරු ගැන අධ්‍යයනයක් වගේ නමුත් තරු ගැන පමණක් නොව මුළු විශ්වය දෙස විපරම් කිරීමේ විද්‍යාව, තාරකා විද්‍යාවයි. ගැලීලියෝගේ දුරදක්නයන් ඇරුඹුණු විපරම අද අභ්‍යාවකාශගත දුරදක්නා ඇසවල් බවට පත් වී තිබෙනවා. එය මිනිස් බුද්ධියේ විස්මයයි!

නමුත් අපිට කොයින්ද ඕවා? අපිට මොකටද ඕවා? කියා හිතන මිනිසුන්ටනම් මෙය සමහරවිට අරුමයක් නොවෙන්නට පුළුවන්! නමුත් අහස සිතුවිලි උල්පතකි. කාව්‍යකරණයට බඳුන් වූ සුන්දරම තැනකි, රාත්‍රී අහස! එය චමත්කාරජනකයි. විශ්මයජනකයි. ඉතින් ඔබේ ඇසින් ලෝකය දෙස බලන්න පෙර ඉහළ ආකාශය දෙස මඳක් බලන්න. එතකොට ඔබට සිතේවී ඔබ කිරි සයුරේ අතරමං වූ තවත් ජීවී පදාර්ථයක්ද කියා?

ඉතින් තාරකා විද්‍යාවට මම මෙසේ ඇරඹුම සටහන් කළා! තවත් ලිපියකින් හමුවෙමු!

“මෙම ලිපිය ශිරෝෂන් රන්දික විසින් ලියන ලද ලිපියකි. ඔහුගේ අවසරය මත උපුටාගැනීම් සිදු විය යුතුයි” ‍ Copyrights © 2010 Shiroshan Randika All rights Reserved.